يا قاريء .. مني رسول الحرف يقرئك السلام= وأنا تراني ربه اللي با الرساله مرسله
اقرا حروفي واذكر اني صار لي عشرين عام= اشتال مصباحي على مشكاة فكري واشعله
زيته من عروقي وبلوره من اطراف العظام= وانا من افخر خامة افكاري صنعت ستايله
العام اضاءت له قلاع الهند وقصور الشوام= واليوم نوره فوق غرناطه وقصر طليلطه
تقدر على نوره تعود لعصر هود وعصر سام= وتمر في حقبة سليمان وتصور هيكله
والا على نوره تقدم الف خطوة للامام= وتعيش عصر ٍ ما طرى لك في خيالك تاصله
اشهى من المن َ ومن السلوى تحت ظل الغمام= واعذب من الدانوب لا منه نبع من منهله
إن قل دل وقيل فا الامثال يا قل الكرام= وان زاد أفاد وصار له فارض القوافي زلزله
خلك على صدره ليا مريت به مثل الوسام= وخله على راسك ليا مر بك تاج وقبله
وان كان تبغى صحبتي فتح عيونك لا تنام= النوم عن بعض المعاني لو ثواني مشكله
قدام نبلغ مجمع البحرين ويصير الخصام= لي شرط واحد وانت كيفك ترفضه او تقبله
والشرط واضح مثل نور الصبح جلاي الظلام= وانا ادري انه صعب ما ينطاق لو تستسهله
يمكن تحس بسطوة وظلم وتعدي وانتقام= وتشوف مني ما يريبك فا الطريق من اوله
لو شفتني اخرق سفينة شعر واقتل لي غلام= وابني جدار ولا اخذ مقابله لو ربع هلله
مسموح لك تنظر بحرية وممنوع الكلام= حلت لك النظرة وحرمت لك جمع الاسئله
واعرف ترى في كل ما اسويه لي قصد ومرام= حتى لو انك ما قدرت تفسره وتحلله
وان كان ما جا بيني وبينك تفاهم وانسجام= قل ( قد بغلت العذر مني) والحديث نقفله
وانا علي اشرح لك اللي صار في مسك الختام= واخبرك ( ما لم تستطع صبرا ً) عليه وتعقله
أما السفينة كانت لشعارفي بحر الغرام= كانوا مساكين ووراهم قلب ما يرحم هله
واما الغلام اللي ذبحته كان شاعر يا حرام= أعوج لو نجيب الفراهيدي عجز لا يعدله
واما الجدار لشاعرين صغار في سن الفطام= تحته كنوز من الذهب عقد وسوار وسلسله
وانا بنيته لا جل يصبح لا عذب الشعر احترام= ويصير للشاعر مقام وللشعر مستقبله
وما فعلته غير بامر محرم البيت الحرام= رحمة من الله با الحروف الابجدية منزله
يا قاري حروفي قضى الما وانتهى كل الطعام= وارست مراكبنا على شط القصيد وساحله
هذا فراق ٌ بيني وبينك على خير ووئام= وليا كتب ربي جمعنا فا اللليال المقبله
لو كان منت بسّيدي موسى عليه أفضل سلام= ولاني شبيه الخضر في تالي قصيدي وأوله