قطرة الما غالية با الذات فا لصيفية= هي اساسا ً غاليه مير العطش غلاها
لو طلب في سدها الساقي مية أوقية= ساقها الظامي عليه ومنّته ما احصاها
لي سنين طوال وغروبي على المطوية= والعطش قتال والساقي يقص رشاها
ان حنيت الراس طاحت مني الطاقية= وان رفعت الراس غربي ما قدرت املاها
واعذب الما اللي نموت ولا نلاقي زيه= في تقاسيم الوجيه الغانمه ولحاها
ما نكست الراس لا جل املى كفوف يديه= الوجيه ان روسها انتكست اراقت ماها
لو يحيط الشوك كل احلامي الورديه= من بداية عرقها اللي فا الثرى لا علاها
السجون ابرك لها من كذبة الحرية= كذبة الحرية اللي با الوهم عشناها
قالها اللي الف الاسطورة الشعبية= واستمعنا من جهلنا له وصدقناها
(عوج بن عنق) ويده ( والحوتة المشوية)= كيف وصلها حدود الشمس ما شفناها!!
خوفنا اللامنطقي من صورة السعلية= حدنا نقبل بشاعتها ونتبناها
يا فضيلة نزلي عن وجهك البوشية= واتركي شمس الحياء تمدنا بضياها
كان طهر الشمس ما يغسل ذنوب الفية= يا عسى ربي من ابراج السما يمحاها
واسعفيني لو سمحتي با العصى السحرية= العصى في يدك وانا احتاجها وابغاها
ما بهش بها وانا راعي بغير رعية= واتعصاها وانا اقوى من قشور لحاها
لي مارب غير عن هذي وعن هذيه= لو درى عنها كليم الله ما خلاها
مو ضروري كل ما القيها تعود حيه= المهم اني متى ما احتجتها القاها!!