سورت ثغرها (اللاوند) و(التولييب)= واختلط مع نقاط الدم في ثغرها
وانتقى خالها منها المكان العجيب=زاوية يلتهم فيها الغضى سمرها
(حارس النار) من شعلة لهبها قريب=حولها ما غفى كنه ولي أمرها
كيف نار المجوس اللي تلظى لهيب= ما احرقت كاهن المعبد على جمرها
تسرق النار من عمر الفتى( بيليزيب)= عام وتعوضه عامين من عمرها
وانت واقف على (الاعراف )مثل الغريب=وقفة طولها مخلوق من قصرها
عين للجنه وغصن الثمار الرطيب=وعين للنار والنفس ومدى وزرها
يوم بنت السما اللي شارفت للمغيب= قصت اخر جديلة نور من شعرها
رحت في خطوتك نبرة بكى عندليب=نبرة تاهت اقدامك على اثرها
كن ما لك بلاد وكن ما لك حبيب= غير من لفت الدنيا على خصرها
خصر ٍاضيق من الدنيا بعين الكئيب= ضيقة ٍوسعت الدنيا على كبرها
اثر معزوفة القسمة ولحن النصيب=نوتةٍ سرمدية ما نشف حبرها
علموها اذا صار التلاقي صعيب= لا تدور عذر لا صرت انا عذرها
وان صدري لو انه ضاق يبقى رحيب=ماهو بصدري الاول على خبرها
وان طعناتها اللي عمرها ما تخيب= خيبت ظنها يوم طعنت صدرها
وانها اخر حكاية في كتاب الاديب= وانها اول قصيدة ما اكتمل شطرها
وان نرسيس قبل بعينها لا يغيب= ما ابتكر زهرة النرجس ولا عطرها
وان منهو دخل في لعبة اليانصيب=( ويبقى الشطر الاخير مرهونا بيد القاريء الكريم حتى اشعار اخر)!!