طبِّل يا طبَّال ،
وغنِّي عـــ الرجال.
فـــ يلاَّ دندن لحنك ،
وقول كمان موَّال.
رجال اليوم يا خالي ،
رجال مليانة هموم.
تشوف الواحد منهم ،
وِشُّه مليان غيوم.
عليه الحزن غطَّى ،
قطَّع منه الهدوم.
فــ تشوفه ماشى أمامك ،
راجل عجوز محروم.
يرضى بأى شيء ،
بصل أو شئت دوم.
ويقولك سيبنى بحالي ،
خلِّيني أصلى وأصوم.
وأدِّى فرض ربى ،
وساعة الفجر أقوم.
وادعى وأ قول يا رب ،
عبدك و أنا مظلوم.
إقبل منى دعوه ،
يا حي يا قيوم.
هذا الراجل عادى ،
ومالوش كده تأثير.
واكل ، شارب ، نايم
ومِمدِّد ع السرير.
ولما تيجي تقول له ،
إن الوضع خطير.
واحنا محتاجينك ،
تساعد كده وتصير.
راجل ولك مكانه،
و كلمه ووضع مثير.
يقول لك يا عم روح ،
هُوَّ أنا يعنى هطير.
خلِّيني ألم نفسي ،
قبل رقابنا تطير.
(2)
غنِّى يا مغنواتي ،
وافتح لنا القاموس.
وقول يا مسحراتي ،
وانشر لنا النصوص.
فيه رجال تشوفهم ،
لا مؤاخذه زى التيوس.
وفيه رجال تشوفهم ،
يتهشُّوا زى الناموس.
وفيه رجال قويه ،
وعـــ الرقاب تدوس.
وفيه رجال عفيَّه ،
وناس واكلها السوس.
وناس تبيع ضميرها ،
وناس تلم فلوس.
وفيه راجل تشوفه ،
عامل نفسه سبع ،
وقدام مراته يبقى ،
عود قصب ممصوص.
وفيه راجل يحبك ،
وراجل عليك مدسوس.
وراجل يموت في بلده،
وراجل عليها جاسوس.
وراجل يضلِّم طريقه ،
وراجل يولَّع فانوس.
وراجل الخير في طبعه ،
وواحد شرَّه موروث.
وراجل عجيب أمره ،
يحب العرقسوس.
وراجل يشرب تمر ،
وواحد يحضن يبوس.
والله الدنيا فيها ،
أشكال كتير وألوان.
وبنات في الحق رجولة ،
ورجال يصيروا نسوان.
هروح أتوضا وأصلى،
وادعى ربِّى كمان.
وأقول يا رب احمينا،
من الغدر والزمان.
واحمي بلادنا دايماً،
واعطينا الأمان.
وهصحى كمان من نومى،
واغنى كان ياما كان.
واقول يا مغنواتى،
وانت يا طبال.
فين زمان النخوه،
وراحت فين الرجال.
*****
د / عمرو الساهرى
من ديوان : شباب كوول وكلام مش معقول
2007
v2.0.5 
