قالت أبي رحله مهي رحله علـى هـام السحـب=قلت ابشري با اللي تبينـه يـا منـاي ومطمعـي
يا مسافره ترى الدروب طـوال والرحلـه تعـب=رحله غريبه واغرب الرحلات مـا كانـت معـي
قالت توكلنا علـى الله مـاش مـوت بـلا سبـب=ترى اطيب الاسباب لا صرت السبب في مصرعي
قلت ادخلي عقلـي وتلقيـن العجايـب والعجـب=وليا طرى لك كنسلي حجـزك وعـودي واقلعـي
واخذت تذاكرها ومـرت بيـن عينـي والهـدب=وانا قفلت رموشـي الثنتيـن باطـراف اصبعـي
مرت سنه بشهورهـا وايـا مهـا واللـي حسـب=فتـرة غيـاب المترفـه دقـات قلبـي واظلعـي
لا جا لها طاري تعـود ولا طـرى لـي ارتكـب=بعض التهور والغي الرحله واقول الهـا ارجعـي
الصيف مر وجا الشتـا والجـو تبـدل وانقلـب=صار الدفا برد وهربـت مـن الخيـال لواقعـي
ما عنـدي الا شالهـا والنـار ووجـار الحطـب=والضحكه اللي من سنه عيـت تفـارق مسمعـي
يا هل ترىترجع وهل هـذا الحضـور المرتقـب=يصبح حقيقه والغياب يمـوت وانشـر بـه نعـي
وفي ليلة فيهـا الثوانـي جمـر والساعـه لهـب=جتني وانا ما بيـن فتـرة يقظتـي والـلا وعـي
تمشي على استحياء والفستان من فـوق الركـب=قلت الله يحييـك فـي مصيافـي وفـي مربعـي
بغيت اعاتبها وقالـت لـي بضحكـه (لا عتـب)=عندي حكي من عام مرهقني ومقلـق مضجعـي
قلت اخبريني قالت التاريـخ لـو حـدث كـذب=ما قال كل اللـي بعقلـك يـا الاديـب الالمعـي
لقيـت فيـه اهـرام واصنـام وتماثيـل ولعـب=والهيكل المزعـوم نايـم حـول عـرش التبعـي
واشعار ابـن زيـدون مـع ولاده ومجلـس ادب=والجاحظ المشهور يقـرا فـي كتـاب الاصمعـي
ولقيـت دار الحكمـه وفيهـا ملاييـن الكـتـب=والفين مخطوطـه لابـن بطوطـه ولـم تطبعـي
واجمل كتاب اعجبني اصلا ( معجم لسان العرب)=قلت العرب وين العرب يا مـن يقـول ويدعـي
راحو طعام جحوش بين اللي ذبـح واللـي نهـب=واللي شرى له يخت في جنـوى وقصـر مربـع
واللي يظلل جيل كامـل بـا الدعايـه والخطـب=الراعـي المسئـول راقـد والرعيـه(لا رعـي)
حسبي عليك الله ما جبتـي معـك غيـر التعـب=رحتـي وكدرتـي برميـه خاطئـه مستنقـعـي
قالت تقـرب والمـس الجمـره وعنقـود العنـب=مير احترص لا تحرق الجمـره شفـاك وبرقعـي