على رمل الطريق اللي تلبس با الفراق وشـاح=كتبت اسمك وعنوانك(غياب الحب وحضـوره)

وقفيت وتركته عبـره لمـن جـا عليـه وراح=وحولـه كلمتيـن مبعثـره طفلـه ومـغـروره

طفيت الشمع با الدمع ورميت بزنـدي القـداح=وخليت الظلوع شموع تحـت دمـوع منثـوره

مثل دمعة كريم حاجته جت فـي يديـن شحـاح=وعيو دونهاواقفـى وغـص بريـق حنجـوره

قتلت الشوق في روحي واثر للشوق سبع ارواح=تجـي روح وتـروح روح منهيـه ومامـوره

اطير لك حمام الشـوق ويعـود كسيـر جنـاح=وانا وش لي بشوق وطاير وجنحـان مكسـوره

عسى الليل الضرير اللي خذاك وكسر المصباح=يجي يوم ويسوق العذر للمصبـاح فـي نـوره

حبيبي كان من عينك غلاي اللي تقولـه طـاح=مثل طيحة ملك من فوق كرسي فوق مقصـوره

عزاي اني قطفت اغلى زهر بستانـك الفـواح=وفي قلبي بقايـا العطـر والبستـان وزهـوره

ليا صار البحر رحلة خطر موج ومطر وريـاح=يموت الحـوت والبحـار ياخـذ ثـار بابـوره

ولا صار الهوى ما له دوى الا مشرط الجـراح=يعيش الحب بامر الطب لـو يمـوت دكتـوره

حرام ان الغرام مقطـع اربـع مجـرم وسفـاح=ولا ياوي لاحد لو كان ريـس مجلـس الشـوره

ما دام انه ليا منـه ذبـح يذبـح بغيـر سـلاح=وش يجيبه تحت حكم الكتاب وسيف اخو نـوره

يجي مثل الرعد والسيـل ويهلـي بـه الفـلاح=ويزرع في ثرى الشريان حب الوصل وبـذوره

ويقفي قبل يصفي معركه كبرى وطعـن رمـاح=صهيل خيول عرض وطول والرايات منشـوره

تبا ترتاح يا قلبي؟ من اللي فا الهـوى مرتـاح=وانا اريحك من ضيم الزمـان وظلمـه وجـوره

لو امسكت العصى من نصها يا الراعي المصلاح=صلح حال الرعيه والعصى ماهيـب مشقـوره

حبيبي دام انا المذبـوح وانـت القاتـل الذبـاح=اخـذ منـي وصـاة مـودع دنيـاه لقـبـوره

غدا يذوي جمالك بعـد مـوت الـورد والتفـاح=ولا يبقى من الذكرى سوى البـرواز والصـوره