مقادير الزمان اهوال وصروف الليال اهـوال =ولكـن المعنـا لـو عشـق درب العنـا ملـه

وانا مليت من درب العنا وهروج قيـل وقـال =وجنبت الطريق وسالفة (وش قـال) وش قلـه

اقدر هيبتي واسمي ومعرفتي وحـرف الـدال =وعيب الرجل ينزل منزل ماهـو بمنـزل لـه

وادور سكـة العقـال واتـرك سكـة الجهـال =ولا اوقف موقف الا عارف اني كفو واهل لـه

ولا اعاتب خطا الجاهل واعاتب في خطا العقال =واقول الله وكيلـه واسفهـه مانيـب رب لـه

ولن شفته تمـادى عقبهـا والا كلامـه طـال =قرنـت الاولـه بـا الثانيـه لله مـا ازلــه


ولا اقبل حق من قطاعـة الساقـه ولا معـدال =ومن يقطع مذاهب سايـره مانـي معـدل لـه


الي مذهب وله مذهب ولي منزل وله منـزال =وانا مهما حصل ما ينطبـق دلـي علـى دلـه

وانا امس العصر حثيت الركايب والهموم جبال =وعينـي للمكـان اللـي يريحنـي وادور لـه

نصيت المرقب اللي عن بسل يبعد ثلاث اميال =تحته الوادي اللـي وادي الشقـره مقابـل لـه

وصلته مع صلاة العصر يوم الفي دوبه مـال =وانا حر يحب المرقب العالـي وياصـل لـه

تعليته وعديته على سـاق وقـدم فـا الحـال =معاميلي معـي والـدرب قدامـي وانـا ادلـه

على جمر الغضى سويت بـراد وثـلاث دلال =الي شف اشـرب الفنجـال والبـراد والدلـه

واخذت اللي كتب لي ربي من الكيف با الفنجال =وبرادي على جمر الغضى باقـي علـى حلـه

حداني للمراقيب الطويلـه ضيقـة فـا البـال =من ظروف الزمان اللي تعقـد الحبـل وتحلـه

افكر فالعرب والقدس والشيشـان والصومـال =وبغداد العـراق اللـي ثـلاث سنيـن محتلـه

وانا في حال ما يعلم بـه الا الله عليـم الحـال =من اهوال تشيب الـراس ميـر المشتكـى لله

متى حال العرب يصلح متى الله يصلح الاحوال =متى مدري متى نلقى الـدوى ونـداوي العلـه

وانا في غمرة التفكير جـات رسالـة الجـوال =رسالة صاحب وقت الطلب يرسل ونرسل لـه

يقول افزع جمال عقيل جت مستاقهـا الجمـال =وقلت اركد وعين خير ويجيـك الخبـر كلـه

نبا نهتجها ونجيك با المكسـب وراس المـال =عقيل اللـي هـذاك العـام اخذنـا ذوده وبلـه

تراغي يا جمال عقيل صارن الحمـول ثقـال =على سحم الغوارب من يحط الحمـل ويشلـه

وانا ما احد سيفي غير لن قابلت لـي رجـال =وادقه فا النحر من مقـدم نصابـه ليـا السلـه

ولن قابلت لي صعلـوك لا طيـب ولا بطـال =اقفي عنه واغمـد سيفـي البتـار مـا اسلـه

يبن هولاكو اللي جت علومك من ثلاث ليـال =يبو عين ليا شافت حمـد ترمـش مـن الذلـه

يا حظ اللي موثق منسبه ما بيـن عـم وخـال =مهو تيمور خاله واردغـان الذيـخ عـم لـه

بعد ما كل واحد راح فـي حالـه وراح لحـال =تجيني منك زله يـا مضريهـا علـى الزلـه

وهذي عادة عيـال الحـرام وعـادة الانـذال =ليا طبـل لهـا شيطانهـا قامـت تطبـل لـه

طلع لك صوت بعد الباب حطوا فيه عشر اقفال =تحسب اني ليا صكوه ما افكه ولا ادخـل لـه؟

وانا والله لو بيني وبينك ضلع شمـرخ حـال =لاهد الضلع واصبحك والا اهجدك فـا الحلـه

تقولون الخطر روح وانا اقول الخطر مـا زال =مقابيس الغضب برق ورعد ومـزون منشلـه

عسى الله يرحم اللي جنسوك ولبسـوك عقـال =وانا خابرك يا الصعلـوك لا مذهـب ولا ملـه