البارحة قفلت باب الصـدر فـي وجـه العتـاب=حتى كسـرت بخاطـر العيـد وتجاهلـت عتبـه
بابٍ يجيب الريـح سـده واستريـح ولا تهـاب=وان هزت اقفالـه عواصيـف العتـب لا تقربـه
المشكله لا هبت بك الريـح وانـت بـدون بـاب=والصدر بيت اضلاعه الجـدران والقلـب عتبـه
والنار تاكل فا الحطب والريح تنثر فـا الزهـاب=وانت الكسير اللي عيونه مـن زهابـه لحطبـه
من سوء حظه جا يطفيهـا بحفنـه مـن تـراب=طارت شراره واحرقت ثوبـه ولحقـت مزهبـه
يا متن ابو زيد الهلالـي سولـف لشلفـا ذيـاب=عن وايل وعن رمح جسـاس ومـداه ومضربـه
سولف واذا دمع السوال اغرق مناديل الجـواب=كفكف دموع الاسئله واكحـل عيـون الاجوبـه
من قال سيف العشق ما يقطع وهو جوف الجراب=انا اشهد انه مـا عـرف سيفـه ولا قـد جربـه
وانا المجرب طعنته من سلتـه حتـى النصـاب=والجرح ينزف له سنـه والـدم واصـل لركبـه
واللي رماني با الخيانـه وابتلانـي بـا الغيـاب=جا يشري الراحه مـن المجـروح ويبيـع تعبـه
جاني وهو يخفي ضيا نوره تحت ليـل الحجـاب=والليل لو يقـدر يحجـب البـدر يمديـه حجبـه
هو ما انتبه ان فيه لوحة (لا يجـوز الاقتـراب)=والا تعمـد يقتـرب منهـا لـو انــه منتـبـه
في مذهبـه انـه اذا اخطـا ولا استغفـر وتـاب=يدخل بدون حساب جنات الهـوى فـي مذهبـه!!
لا والله الا فيه بعـث ونشـر وحسـاب وعـذاب=وفيه الصراط المستقيـم اللـي لـزوم يمـر بـه
اطعم مية مسكين؟ واعتق له ثلا ث من الرقـاب؟=والله مـا ينفعـه لـو يعتـق ثمانـيـن رقـبـه
وينه نهار الصدر وادي خوف وهمومـي ذيـاب؟=وانا اقطع الوادي واجي من مشرقه فـي مغربـه
ادور المـا والظمـا قتـال والـوادي ســراب=وليا لقيت المـا سـراب ابـل ريقـي واشربـه
كم قلت له وجه الخطا مرسوم في عين الصـواب=وكم قلت له عين الصواب اعرف خطاك وصوبه!
من كثر ما علقت في صدري من اعـذاره كتـاب=صارت شراييني رفـوف وصـار قلبـي مكتبـه
قبل اعرفه كنت اكذب الشعار واعذبهـم خطـاب=واكثرهم ايمان بمقولـة اعـذب الشعـر اكذبـه
وعقب اعترض لي في طريقي يا لعله با الذهـاب=اصبحت انا صاحب مقولة اكذب الحب اعذبـه!!