ناديت باعلى الصوت حاتم حي؟ قالوا طي مات=قبره تحت وجه التراب وتركته فـوق الـورق
ما به حياه لمن تنادي فات عصـر المكرمـات=يا لاحق المطرود تطرد واحـد ٍمـا ينلحـق؟!!
قلت اتركوني تحت جلباب العصور الماضيـات=جلبابها انعم من حرير الحاضـر القاسـي وارق
افاقي اوسع من مفاهيـم العقـول الضيقـات=توسع خطوط الطول والعرض ويضيق بها الافق
على الحياه برغم قل الحيل يحسدنـي الممـات=وتحسدني الدنيا بقسوتهـا علـى اخـر رمـق
كل الطرق كانت تؤدي بي ومن كل الجهـات=لا بواب روما الروم مير اليوم يا قل الطـرق!!
وانا مثل كل البشر با لظبط في جل الصفـات=يصيبني هم ونصب وافـراح واحـزان وارق!
(واطيب مكانٍ فا الدنى سرج الجياد السابحـات=واوفى صديق كتاب فا الدنيا لو انه ما صدق!!)
يا ليل عز البيـد والا العاديـات الضابحـات=في عثرة حصانٍ ليا منه ركـض معهـن سبـق
وخلك معي طيب يبو الطيب وانا ابو الطيبات=مافيه طيب قبل ابو الطيب ولا بعـده خلـق!!
في عصر كثر الانبياء وعصر قـل المعجـزات=لا اصبح النمرود اله ولا براهيـم احتـرق!!
وانا اعترف باني فعلت من الذنوب الموبقـات=ما لا يحملني عقـاب ولا سخـط رب الفلـق
لا صارت الحسنات عند الناس غير السيئـات=فا الامر عندي يختلف والوضع عنـدي يتفـق
اربع ذنوب ولا طلبـت لفعلهـن مكفـرات=واثبت عليها بـا الادلـة والحديـث المتفـق
إني سحرت بلا عقـد ولا طلاسـم نافثـات=ما غير شاعر يسحر الالبـاب لا منـه نطـق
واني سرقت اعجاب جيل من الشباب ليا البنات=اشرف حرامي غير الاعجاب الحقيقي ما سـرق
واني شربت اشد نوع من الخمور المسكـرات=بين الثنايا والشفاه اللي مثـل لـون الشفـق
واني انا اللي يوم واجـه للعيـون الناعسـات=ولى وسهم النظرة الاولى مكانـه مـا انطلـق