يا عاذل القلب ما دينـك علـى دينـي=ابعـد خطاويـك يمـي لا تعرجـهـا

دربك يسـار ودروب العاشـق يمينـي=كل علـى مـا يبـي رجلـه يدرجهـا

اقفـت بعارينـك وقفـت بعاريـنـي=والناس مـا تتفـق دايـم منـا هجهـا

لو شفت ما شفت في دنيـا المحبينـي=ضاقت بك الارض مدخلها ومخرجهـا

الطفله اللـي مسويـة العجـب فينـي=في مدرسة عشق وانا انطـر تخرجهـا

اعطيتهـا القلـب كـراس وشرايينـي=مـن دمهـا الحبـر ليـن الله يفرجهـا

يومين تحضر ويوم تغيب (يـا عينـي)=وانا عشان الغـلا مـا ودي احرجهـا

اخـاف لاحرجتهـا تبكـي وتدعينـي=(با المنطق الشمري)( جبته على وجها)

دايـم تغنـج وتذبحـنـي وتحييـنـي=وانـا ( وش مضيعـن) الا تغنجـهـا

ترضى ليا ازعلتها وازعل وترضينـي=من زود حرصي عليها ودي ازعجهـا

يوم عرضت لـي وقلـت الله يكافينـي=من عينهـا يـا الله عيونـي تخارجهـا

وتجيبنـي نظـره ونظـره توديـنـي=وانا مغير اسـرق النظـره وابرمجهـا

حاولت ارد النظر مـا عـاد يمدينـي=رمح الهدب شقـق ظلوعـي وفججهـا

لو انهـا تسمـح بفرصـه وتعطينـي= لاشـق صـدري واوريهـا وافرجهـا

هـي صوبتنـي وعيـت لا تداوينـي=وانـا لـو انـي مصوبهـا لاعالجهـا

وان جابها الله تحت موسـي وسكينـي=لاشعل شموع الغرام وخيلـي اسرجهـا

يا صغير السن يا مجمـول يـا زينـي=هي كلمه اربع حروف اعرف مخارجها

الكلمه اللـي تعبـر عـن مضامينـي=وقفت على اطرف لساني قبل لا اهرجها

لو هي علي انتظرت شهور وسنيـنـي=مير انت قلهـا( وطالـت لا تسمجهـا)